هاوکات لەگەڵ هەڵکشانی پێکدادانە مەیدانییەکان لە باکوور و ڕۆژهەڵاتی سووریا، هەوڵە نێودەوڵەتی و هەرێمییەکان بۆ هێورکردنەوەی گرژییەکانی نێوان سوپای عەرەبیی سووریا و هێزەکانی سووریای دیموکرات (هەسەدە) دەستیان پێکردووە. لە کاتێکدا پاریس و هەولێر داوای ئاگربەست دەکەن، هەسەدەش لە هەوڵدایە بۆ رێگریکردن لە تەشەنەسەندنی زیاتری شەڕ.
ئەسعەد شەیبانی، وەزیری دەرەوەی سووریا چەند پێشنیازێکی بۆ هەسەدە ناردووە، هاوکات مەزڵووم عەبدی، فەرماندەی گشتیی هەسەدە و ئەحمەد شەڕع، سەرۆککۆماری سووریا بە تەلەفۆن قسەیان کردووە. هەرچەندە بڕیاربوو ئەمڕۆ عەبدی سەردانی دیمەشق بکات، بەڵام سەرچاوەکان دەڵێن سەردانەکە بۆ کاتێکی دیکە دواخراوە و ئەگەری ڕاگەیاندنی ئاگربەست لە ئارادایە.
نیگەرانییە نێودەوڵەتییەکان
ئیمانوێل ماکرۆن، سەرۆکی فەرەنسا، ڕایگەیاند کە بەیانیی ئەمڕۆ لەگەڵ ئەحمەد شەڕع قسەی کردووە و "نیگەرانیی قووڵی" خۆی لەبارەی بەردەوامیی هێرشەکانی سوپای سووریا پێ ڕاگەیاندووە. ماکرۆن جەختی لە پێویستیی ئاگربەستێکی هەمیشەیی کردەوە و داوای کرد هەسەدە لە چوارچێوەی دەوڵەتی سووریادا و لەسەر بنەمای گفتوگۆکانی مانگی ئازاری ڕابردوو تێکەڵ بکرێتەوە، وەک زامنی یەکپارچەیی سووریا.
لەلایەکی دیکەوە، مەسعود بارزانی لە هەولێر کۆبوونەوەیەکی هاوبەشی لەگەڵ تۆم باراک، نێردەی تایبەتی دۆناڵد ترەمپ بۆ کاروباری سووریا و مەزڵووم عەبدی و سەرۆکی ئەنەکەسە ئەنجامدا. بارزانی هیوای خواست بە زووترین کات شەڕ ڕابگیرێت و لایەنەکان بگەڕێنەوە بۆ ڕێککەوتنەکانی پێشوو.
دۆخی مەیدانی و پێکدادانەکان
سەرەڕای هەوڵە سیاسییەکان، مەیدانی جەنگ بە گەرمی ماوەتەوە. هێزەکانی سووریای دیموکرات ڕایانگەیاندووە کە سوپای سووریا و گرووپە چەکدارە هاوپەیمانەکانی، بە تانک و تۆپباران هێرشیان کردووەتە سەر ناوچەکانی ڕەققە و تەبقا و دەوروبەری بەنداوی تشرین.
شەڕڤانێک گوتی: "لە بەنداوی تشرین سێ هێرشمان تێکشکاندوون و بە درۆنی 'برووسک' بەرپەرچی چەکدارەکانمان داوەتەوە." ئەم گرژییانە لە کاتێکدایە کە هەسەدە پێشتر بڕیاری کشانەوەی لە دێر حافر و مەسکەنە دابوو بۆ کەمکردنەوەی ئاڵۆزییەکان، بەڵام دەڵێن سوپای سووریا بەبێ ڕێککەوتنی پێشوەختە لە دێرەزوور هێرشی کردووەتە سەریان.
مەزڵووم عەبدی، فەرماندەی گشتیی هەسەدە، لە لێدوانێکی فەرمیدا ئاماژەی بەوە کرد کە هەوڵە نێودەوڵەتییەکان بۆ ئارامکردنەوەی دۆخەکە بەردەوامن، بەڵام هاوکات داوای پاڵپشتیی جەماوەریی کرد بۆ ڕووبەڕووبوونەوەی ئەو هەڵکشانە سەربازییەی کە بەرۆکی ناوچەکەی گرتووە.
