حکومەتی ئەفریقای باشوور داوا لە دەسەڵاتدارانی ئێران دەکات رێز لە مافی خۆپێشاندانی ئاشتییانەی خەڵک بگرن و داواش لە هەموو لایەک دەکات "ئەوپەڕی دانبەخۆداگرتن" بنوێنن. ئەم هەڵوێستەش دوای ئەوە دێت کە ئەو وڵاتە رۆڵی ئێرانی لە مانۆڕێکی سەربازیی هاوبەشدا سنووردار کرد.
نووسینگەی سەرۆکایەتیی ئەفریقای باشوور، رۆژی یەکشەممە لە بەیاننامەیەکدا رایگەیاند، لە کاردانەوە بەو راپۆرتە نێودەوڵەتییانەی باس لە زیادبوونی ژمارەی کوژراوان و پشێوییەکان دەکەن، داوایان لە تاران کردووە "مافی خۆپێشاندانی ئاشتییانەی هاووڵاتییان مسۆگەر بکات."
لە بەیاننامەکەدا جەخت لەوە کراوەتەوە کە "ئاشتی و سەقامگیریی بەردەوام تەنیا لە رێگەی ئەو چارەسەرانەوە دێتە دی کە خەڵکی ئێران رۆڵی سەرەکییان تێدا هەبێت."
ئەم لێدوانە دیپلۆماسییەی پریتۆریا هاوکاتە لەگەڵ گۆڕانکاری لە مامەڵەی ئەو وڵاتە بەرامبەر بە ئێران لە مانۆڕی دەریایی وڵاتانی "بریکس" کە ئێستا لە کەناراوەکانی ئەفریقای باشوور بەڕێوەدەچێت. هەفتەی رابردوو بەرپرسانی ئەفریقای باشوور بە مەبەستی کەمکردنەوەی گرژییەکان لەگەڵ واشنتن، داوایان لە ئێران کرد کەشتییە جەنگییەکانی لە مانۆڕەکە بکێشێتەوە و تەنیا وەک "چاودێر" ئامادە بێت؛ راپۆرتەکان ئاماژە بەوە دەدەن کە کەشتییە ئێرانییەکان گەڕاونەتەوە.
هاوکات لەگەڵ ئەم گوشارانە، رێکخراوی مافی مرۆڤی ئێران کە بنکەکەی لە نەرویجه، رایگەیاندووە کە تاوەکو ئێستا لانی کەم سێ هەزار و ٤٢٨ کەس لە خۆپێشاندانەکانی ئەم دواییەی ئێراندا کوژراون.
شایەتحاڵەکان و ئەو کەسانەی لە رێگەی ئینتەرنێتی مانگییەوە (ستارلینک) پەیوەندییان بە دەرەوە کردووە، باس لە "تووندوتیژیی بێوێنە" دەکەن و دەڵێن ژمارەیەکی زۆر تەرم و برینداریان لە ناوەندە پزیشکییەکاندا بینیوە. پچڕانی هێڵەکانی ئینتەرنێت و تەلەفۆن لە چەند رۆژی رابردوودا، پرۆسەی پشتڕاستکردنەوەی ئامارە وردەکانی بۆ میدیا نێودەوڵەتییەکان و رێکخراوەکانی مافی مرۆڤ قورستر کردووە.
