هێزە ئەمنییەکانی ئێران لە درێژەی شەپۆلی دەستگیرکردنی هاووڵاتییانی کورد، سێ گەنجی دیکەیان لە یەکێک لە گوندەکانی مەهاباد دەستبەسەر کرد و بۆ شوێنێکی نادیار گواستیاننەوە.
بەرەبەیانی ڕۆژی دووشەممە، هێزە ئەمنییەکان هەڵیانکوتاوەتە سەر گوندی "بەفرەوان" لە ناوچەی شاماتی سەر بە شاری مەهاباد و سێ گەنجیان بە ناوەکانی "مەنسوور عەباسی"، "ئەحەد خەیری" و "واحید خەیری" دەستگیر کردووە. ئەحەد و واحید برای یەکترین و بێ پیشاندانی هیچ مۆڵەتێکی دادوەری لە ماڵەکانی خۆیاندا ڕفێندراون.
بەپێی ڕاپۆرتی ڕێکخراوی مافی مرۆڤی "کوردپا"، تاوەکو ئێستا هۆکاری دەستگیرکردن و ئەو تۆمەتانەی ئاڕاستەی ئەم سێ هاووڵاتییە کراون نادیارە. بەرپرسانی ئەمنی هیچ ڕوونکردنەوەیەکیان بە بنەماڵەکانیان نەداوە و ڕێگەیان پێنەدراوە پەیوەندیی تەلەفۆنی بکەن.
چارەنووسی ئەم سێ گەنجە ناڕوونە و شوێنی ڕاگرتنیان ئاشکرا نەکراوە. ئەم دەستگیرکردنە "خۆسەرییانە" لە کاتێکدایە کە گوشارە ئەمنییەکان لە ناوچە کوردنشینەکانی ڕۆژهەڵاتی کوردستان بەردەوام لە زیادبووندان.
