کۆمەڵێک پزیشکی چاو لە ئێران لە نامەیەکی سەرئاوەڵادا بۆ بەرپرسانی باڵای وڵاتەکەیان، ناڕەزایەتییان دەربڕی بەوەیکە ژمارەیەکی زۆری خۆپێشاندەرەکان چاویان بریندار بووە و ئەمەشیان بە جێی نیگەرانی لە قەڵەم داوە.
لەو بەیاننامەیەدا کە ئاراستەی سەرۆکى دەسەڵاتەکان و بەرپرسانی سەربازی و دادیی ئێران کراوە، پزیشکەکان بەکارهێنانی بەرفراوان و "بێسەروبەر"ی تفەنگی ساچمەزەن بە هۆکاری سەرەکیی ئەو پێکانانە دەزانن. ئاماژە بەوەش کراوە کە بەئامانجگرتنی دەموچاو و چاوی خۆپێشاندەران لە رووی پزیشکی، ئەخلاقی و مرۆییەوە "بە هیچ شێوەیەک قبووڵکراو نییە."
ئەو پزیشکانە نابیناکردنی مرۆڤەکان، تەنانەت لە کاتی نائارامییەکانیشدا، بە "بەڵگەی ستەم و پێشێلکردنی کەرامەتی مرۆڤ" وەسف دەکەن. داواشیان کردووە دەستبەجێ بەکارهێنانی چەکی ساچمەیی رابگیرێت و لێکۆڵینەوەی سەربەخۆ لەبارەی حاڵەتەکانی نابینابوون بکرێت. هەروەها داوای سزادانی ئەنجامدەران و قەرەبووکردنەوە و دابینکردنی چارەسەری پزیشکییان بۆ قوربانییەکان کردووە.
ئەم هۆشدارییەی پزیشکان لە کاتێکدایە، لە دەستپێکی خۆپێشاندانەکانی مانگی بەفرانباری ١٤٠٤ـەوە، رێکخراوەکانی مافی مرۆڤ مەزەندە دەکەن هەزاران کەس لە ئێران کوژرابن یان بریندار بووبن.
