ڕێکخراوەکانی مافی مرۆڤ ئامارێکی شۆکهێنەریان لەبارەی قوربانیانی خۆپێشاندانەکانی ئەم دواییەی ئێران بڵاوکردەوە؛ بەپێی ئامارە نوێیەکان ژمارەی کوژراوان 7 هەزار کەسی تێپەڕاندووە، ئەمەش لەکاتێکدایە حکومەت ئامارێکی زۆر کەمتر ڕادەگەیێنێت.
ئەم سەرکوتکردنە توندوتیژە یەکێکە لە خوێناویترین قۆناغەکانی مێژووی کۆماری ئیسلامی. خۆپێشاندانەکان لە سەرەتای ساڵی 2026 چڕبوونەوە و هێزە ئەمنییەکان لە ڕۆژانی 8 و 9ی کانوونی دووەمدا بەکارهێنانی هێزی کوشندەیان گەیاندە لووتکە. بۆ شاردنەوەی قەبارەی کۆمەڵکوژییەکەش، تاران بۆ ماوەیەکی زۆر هێڵەکانی ئینتەرنێتی بەتەواوی بڕی.
ئۆرگانی هەواڵی چالاکوانانی مافی مرۆڤ (هرانا) ڕایگەیاند، تاوەکو 24ی ڕێبەندان، زیاتر لە حەوت هەزار کەس کوژراو و نزیکەی 26 هەزار کەسیش برینداریان تۆمار کردووە. هاوکات تۆڕی مافی مرۆڤی کوردستان پشتڕاستی کردەوە کە تەنیا 240 هاووڵاتیی کورد لە شارە جیاوازەکاندا بە تەقەی هێزە ئەمنییەکان گیانیان لەدەستداوە، ئەمەش نیشاندەری قەبارەی توندوتیژییەکانە لە رۆژهەڵاتی کوردستان.
