هێزێکی یەکێتیی نیشتمانی کوردستان له سنووری نێوان ڕۆژهەڵات و باشووری کوردستان، پێش له کاراونێکی کۆڵبەران دەگرن و وێرای لۆمه کردنیان بۆ تێپەڕاندنی سنوور، دەست دەخەنه سەر کەلوپەلەکانی کۆڵبەران و ڕادەستی گومرکی کۆماری ئیسلامی ئێران دەکەن.
بەپێی ئەو گرته ڤیدئویه که بەدەست ئاڤاتودەی گەیشتووه، یەکەیەک له چەکدارانی یەکێتیی نیشتمانی کوردستان له ژێر ناوی پاسەوانانی سنوور، پێش له کاروانێکی کۆلبەرانی ڕۆژهەڵات دەگرن و دەست دەخەنه سەر کەلوپەلەکانیان و ڕادەستی گومرکی کۆماری ئیسلامی ئێران دەکەن.
لەم گرته ڤیدئویه‌دا، فەرماندەی ئەو یەکەیه ڕوو له کۆڵبەرانی ڕۆژهەڵات دەکات و به بێ‌ڕێزییەکی تەوا دەڵێت: "بۆچی سنوورت بەزاندووه و کەل‌وپەلی قاچاخت هێناوەته کوردستان". که یەکێک له کۆڵبەران له وەڵامدا دەڵیت: "گەورەم هەژارین و بۆ بژێوی ڕۆژانەمان مەجبورین، له لای ئێمه دەرفەتێکی دیکه نییه".
دواتر بەرپرسەکه فەرمان دەداته چەکدارانی یەکێتی تاکوو دەست بخەنەسەر کەل‌وپەلی کۆڵبەرانی ڕۆژهەڵات و ڕادەستی گومرکی کۆماری ئیسلامی بکەن.
ئەمه یەکەم جار نییه که هێزەکانی یەکێتی بەم شێوەیه هەڵسەوکەوت لەگەڵ کؤلبەرانی ڕۆژهەڵاتی کوردستان دەکات. له یەکەم ڕۆژی ڕێبەندانی ١٤٠٢ی هەتاویدا، هێزەکانی یەکێتی کۆمەڵێک له کۆڵبەرانی خەڵکی جوانڕۆیان له سنووری هەڵەبجه دەستبەسەر کردبوو که دوای ئەشکەنجەیەکی زۆر، سەریان دەتاشن و بەبێ‌پێڵاو ئاودێوی سنووری ڕۆژهەڵاتی کوردستانیان دەکەن.
ڕاستییەکی حاشاهەڵنەگره که به ناکارابوونی هێزە سیاسییە‌کانی ڕۆژهەلاتی کوردستان، خەباتی مەیدانی سووک و لاواز کراوه و هەر ئەمەش بووەته مایەی لەدەستچوونی سەنگ و قورسایی ڕۆژهەڵات و هەر بۆیەش یەکێتی به خۆی ئەو جورئەته دەدات لەگەڵ شارۆمەندی کورد بەم شێوه ناشیرینه هەڵسەوکەوت بکات.
