نەتەوە یەکگرتووەکان بڵاوى کردەوە کە لە ئەنجامى ئۆپەراسیۆنى "کانى ئاشتى"ـى ئەرتەشى تورکیە کە نزیکەى سێ ڕۆژە بۆ سەر باکوورى رۆژئاوا و ڕۆژهەڵاتى فورات دەستى پێ کردووە، بووەتە هۆى ئاوارەبوون و قەلەندەرى سەدان هەزار کورد و عەرەب و کریستیان و زۆرێک لە بازاڕ و قوتابخانە و دەرمانگەکانى ئەم ناوچەیە داخراون.
بە پێى ڕاپۆرتى ئەسۆشیتد پرێس، لە ئەنجامى بۆمبارانى فڕۆکە و تۆپبارانى تۆپەکانى ئەرتەشى تورکیە، ئاوى خواردنەوەى حەسەکە پچڕاوە و ئێستا ٤٠٠ هەزار کەس لە ژێر هەڕەشەى بێ ئاویدان و بە هۆى ئەوەى کە ناوەندى چاککردنەوە (سیانە)ش وەستێنراوە، دەرفەتى چاککردنەوەى تۆڕەکە نییە. هەروەها کارەباى زۆرێک لە شار و گودەکانى ڕۆژئاوا پچڕاوە و خەڵکى لە بێ کارەباییەکى ڕەهادا دەژین.
شایەنى باسە ڕەجەب تەیب ئەردۆغان سه‌ركۆماری توركیا بەر لە ئۆپەراسیۆنەکە و دواتریش پێداگرى لەسەر ئەوە کردبووەوە کە "ئەم ئۆپەراسیۆنە بۆ گێڕانەوەى ئاوارە سورییەکان و دامەزراندنەوەى ناوچەیەکى ئارامە و کەسى تێدا نابێتە قوربانى"، کەچى لەکاتى ئۆپەراسیۆنەکەوە تا ئێستا سەدان هەزار کەس ئاوارە بوونە و ماڵ وحاڵى خۆیان جێ هێشتووە و هەروەها دەیان کەس لە خەڵکى سڤیل بوونەتە قوربانى کە ژن و منداڵ تیایاندا زۆرە.
