بەرەبەیانى ١٤ى خاکەلێوە سوپاى پاسداران و هێزە ئەمنییەکان بۆ ئەوەى بەربەستە دروستکراوەکانى خەڵکى لەبەردەم لافاوەکە لابەرت، ڕووبەڕووى خەڵک و جوتیارانى جلیزى بوونەوە و هەر ئەمەیش بووە هۆى دروستبوونى تەقە و برینداربوون و کوژرانى خەڵک.
بە دروستبوونى لافاو لە هەندێک پارێزگاى وەک گوڵستان و شیراز و لوڕستان، خەڵکى زۆر شار و شارۆچکەى دیکەى پارێزگاکانى ترى ئێران کەوتنە خۆیان بۆ ئەوەى بەربەست و لافاوبەست لەبەردەم ئەو ئاراستانەى ئاو و لافاو دروست بکەن کە دەشێت مەترسیدار بێت بۆ سەر ماڵ و حاڵى خەڵکى.
جوتیارەکانى جلیزى لە ئاراستەى ئەڵاوئەکبەرى دەشتى ئازادگانى پارێزگاى خوزستان، بۆ پاراستنى زەوییە کشتوکاڵییەکان و ماڵ و حاڵیان، دەستیان بە دروستکردنى بەربەست کرد بۆ ئەوەى ناو زەحمەتى چەندین ساڵەیان وێران نەکات هەروەک شارەکانى دیکەى کارەساتبار، کەچى هێزە ئەمنییەکان و سوپاى پاسداران بۆ پاراستنى دامەزراوە نەوتییەکان و لەبرى دۆزینەوەى ڕێگەچارەى دیکە دەستیان بە خراپکردنى ئەو بەربەستانەى خەڵکى جوتیارى ناوچەکە کرد و هەر ئەمەیش ناڕەزایەتى خەڵکەکەى لێ کەوتەوە.
سوپاى پاسداران و هێزە ئەمنییەکانیش بۆ ڕەواندنەوە و ترساندنى خەڵکى ڕاستەوخۆ دەستیان بە تەقەکردن کرد و لە ئەنجامدا دوو کەس لە خەڵکى ناوچەکە کە جوتیاریشن گیانیان لەدەست دا و چەندین کەسى دیکەیش بریندار بوون.
"عبود ڕەبیعى" کوڕى خەلەف و خەڵکى گوندى جلیزى و کەسێکى دیکە کوژراوەکانى خەڵکى ناوچەکەن و چوار کەسیش بریندار بوون کە یەکێکیان لە هێزە ئەمنییەکانە. عبود پاش برینداربوون دەگوازرێتەوە بۆ نەخۆشخانەى ئاپادانا و لەوێ گیان لەدەست دەدات. ئەم جوتیارە جلیزییە، سێ کوڕ و سێ کچیى هەیە کە هیچیان هاوسەرگیرییان نەکردووە و تەنیا داهاتى ئەم بنەماڵە هەشت کەسییە زەوییە کشتوکاڵییەکەیان بوو کە سوپاى پاسداران ویستى بە تێکدانى لافاوبەستەکان بیخاتە ژێر لافاوەوە.
لینکى تەقەکردن و دەرگیرى هێزەکانى سوپا لە جووتیارانى خەڵکى جلیز
