کوردستان

سزای دوو ساڵ زیندانی بۆ ئارمان شادیوەند، گۆرانیبێژ و ئاوازدانەری خەڵکی دڕەشار، ڕۆژی دووشەممە ٢٩ی بانەمەڕی ١٤٠٤ لەلایەن دادگای پێداچوونەوەی ئیلامەوە پشتڕاست کرایەوە.

مامۆستا ئایەت غوڵامی، ئیمامی پێشووی مزگەوتی گەورەی "محەممەد ئەلمستەفا" لە کرماشان و وانەبێژی خوێندنی ئایینی، کە پێشتر بە دانانی بارمتەی ٧٠٠ میلیۆن تمەن ئازاد کرابوو، جارێكی دیكە بۆ ڕۆژی چوارشەممە ٣٠ی بانەمەڕی ١٤٠٤ بانگهێشتی دادگای تایبەتی ڕۆحانیەت کراوەتەوە. 

موتەلیب ئەحمەدیان، زیندانیی سیاسیی کورد کە لە پازدەهەمین ساڵی حوکمی ٣٠ ساڵ زیندانییەكەیەتی لە زیندانی ئێڤین، لە پانزەهەمین ڕۆژی مانگرتن لە خواردن و دەرمانەكانی لە دۆخێكی خراپدایە.

بەرەبەیانی ڕۆژی سێشەممە ٣٠ بانەمەڕ، سزای سێدارەی گۆران قادری خەڵکی مەریوان لە بەندیخانەی ناوەندیی شاری سنە جێبەجێ کرا.

ڕۆژی دووشەممە ٢٩ی بانەمەڕ، وەهاب خەدیریپوور تەمەن ٣٢ ساڵ و خەڵکی مەهاباد بە مەبەست جێبەجێکرانی سزای بەندکرانەکەی دەستبەسەر و بۆ بەندیخانەی ناوەندیی مەهاباد گواسترایەوە.

جەلال محەممەد کەریمی، هاووڵاتیی کوردی خەڵکی بۆکان کە لە کاتی سەرهەڵدانی بزووتنەوەی "ژن، ژیان، ئازادی"دا دەستبەسەر کرابوو، لەلایەن دادگای تاوانەکانی بۆکانەوە بە تۆمەتی "هەڵگرتنی چەک" بە ١٠ ساڵ زیندان مەحکووم کرا. 

یەک لەسەر سێی ئەم سزایە بۆ ماوەی دوو ساڵ ڕاگیرا. 

سوهەیلا مەتاعی، چالاکی مەدەنیی خەڵکی دێولان بەپێی بەڵگەیەکی بانگکران بە تۆمەتی "پڕوپاگەندە لە بەرژەوەندیی گرووپ یان ڕێکخراوە دژبەرەکانی نیزامی کۆماری ئیسلامیی ئێران" بانگی لقی ١٠٢ی دادگای کەیفەریی ئەم شارە کراوە.

سەرلەبەیانیی ڕۆژی پێنجشەممە ٢٥ی بانەمەڕی ١٤٠٤، دوو برا بە ناوەکانی "عەزیزعەبدوڵڵازادە" تەمەن ٣٣ ساڵ و "ئومید عەبدوڵڵازادە" تەمەن ٣٥ ساڵ و خەڵکی گوندی "حوسێن ئاباد" سەر بە شاری بۆکان، لەلایەن هێزە ئەمنییەتییەکانەوە دەسبەسەر کران.

دووهەمین داواکاریی حاتەم ئوزدەمیر، بەندکراوی سیاسیی کوردی خەڵکی باکووری کوردستان، بۆ پێداچوونەوە بە حوکمەکەی لەلایەن دیوانی باڵای ڕێژیمەوە ڕەت کرایەوە.

ڕۆژی دووشەممە ۲۲ی بانەمەڕی ١٤٠٤، ئالان محەممەدی، تەمەن ۲۵ ساڵ و خەڵکی شاری مەریوان بەمەبەستی جێبەجێکرانی سزای پێنج ساڵ بەندکرانەکەی دەستبەسەر کرا و بۆ بەندیخانەی ناوەندیی ئەو شارە گواسترایەوە.