٢٢وڵاتی جیهان، لەنێویاندا ویلایەتە یەکگرتووەکانی ئەمریکا و چەندین وڵاتی ئەوروپی، لە بەیاننامەیەکی هاوبەشدا داوایان لە ئێران کرد دەستبەجێ هێرشکردنە سەر نەیارانی لە دەرەوەی خاکەکەی ڕابگرێت. ئەم وڵاتانە سەرکۆنەی بەکارهێنانی "شەرمەزارانە"ی باندە تاوانکارییە نێودەوڵەتییەکانیان لەلایەن دەزگا ئەمنییەکانی ئێرانەوە کرد بۆ لێدانی ئۆپۆزسیۆن.
بەیاننامە هاوبەشەکە جەخت دەکاتەوە، هەوڵەکانی تاران بۆ کوشتن، ڕفاندن، یان هەراسانکردنی نەیارانی لە ئەوروپا، ئەمریکای باکوور و ئوسترالیا، پێشێلکردنی سەروەریی نیشتمانی و یاسا نێودەوڵەتییەکانە. ئاماژە بەوە دراوە کە هەواڵگریی سوپای پاسداران و فەیلەقی قودس لە پشت "پلانە کوشندەکان"ن دژی ڕۆژنامەنووسان و بەرژەوەندییەکانی ئیسرائیل و بەتایبەتیش گروپە ئۆپۆزسیۆنەکان.
ئەم هۆشدارییە لە کاتێکدایە کە چالاکانی سیاسی و حیزبەکانی ڕۆژهەڵاتی کوردستان (کەمپەکانیان لە هەرێمی کوردستان و شوێنەکانی دیکە) بەردەوام لەژێر هەڕەشەی تیرۆر و ڕفاندنی دەزگا ئەمنییەکانی ئێراندان. وڵاتانی واژۆکەر دەڵێن تاران گروپە تاوانکارییەکانی بۆ "کارە خەبیسەکان" دژی ئەم نەیارانە بەکار دەهێنێت.
لە بەیاننامەکەدا باس لە گروپی "ئەسحابولیمین" کراوە کە پەیوەندیی بە ئێرانەوە هەیە و بەرپرسیارێتیی چەندین هێرشی لە بەریتانیا، بەلجیکا و هۆڵەندا لە ئەستۆ گرتووە. ئەم ٢٢ وڵاتە ڕایانگەیاندووە کە یەکگرتوون لە پاراستنی هاووڵاتییەکانیان و ڕێگە نادەن ئێران خاکی وڵاتانی دیکە بۆ یەکلاکردنەوەی ململانێ سیاسییەکانی بەکاربهێنێت.
