بەپێی راپۆرتێکی شیکاریی رۆژنامەی "جێرۆزالم پۆست"ی ئیسرائیلی، کورد لە رۆژهەڵاتی ناوەڕاستدا لەبەردەم گێژاوێکی سیاسیی مەترسیدار دایە. راپۆرتەکە تیشک دەخاتە سەر ئەوەی کە چۆن بەرژەوەندییە نێودەوڵەتییەکان و لۆبییە سیاسییەکان لە واشنتن بوونەتە هۆی لاوازکردنی پێگەی کورد، بەتایبەت لە سایەی هەوڵەکانی کەسایەتییەکی وەک تۆم باراک.
تۆم باراک، باڵیۆزی ئەمریکا لە ئەنقەرە و نوێنەری تایبەتی ئەمریکا بۆ سوریا و عێراق، رۆڵێکی سەرەکیی گێڕا لە ئاراستەکردنی سیاسەتەکانی واشنتن بەرەو پاراستنی بەرژەوەندییەکانی هەندێک دەوڵەتی ناوچەکە، لەوانە تورکیا و قەتەر و سەعودیە. بەپێی "جێرۆزالم پۆست"، ئەم چالاکییە لۆبییانە زۆرجار لەسەر حیسابی کورد بوون و وایانکردووە کورد وەک کارتێکی فشار یان قوربانی لە رێککەوتنە گەورەکاندا سەیر بکرێت، ئەمەش ئاستەنگی گەورەی بۆ دیپلۆماسییەتی کورد دروست کردووە.
لە لایەکی دیکەوە، راپۆرتەکە ئاماژە بە رۆڵی "خراپ و تێکدەرانەی" تورکیا دەکات. ئەنقەرە بەردەوامە لە بەکارهێنانی هێزی سەربازی و گوشاری سیاسی بۆ رێگریکردن لە هەر دەستکەوتێکی کورد لە سووریا و عێراق. سیاسەتەکانی تورکیا بە ئاشکرا دژی قەوارەی سیاسیی کوردن و هەوڵی تێکدانی ئەو سەقامگیرییە دەدەن کە کورد لە ناوچەکەدا دروستی کردووە، ئەمەش وەک هەڕەشەیەکی بوونی (Existential threat) بۆ سەر گەلی کورد وەسف کراوە.
سەبارەت بە پەیوەندییەکانی کورد و ئیسرائیل، رۆژنامەکە باس لەوە دەکات کە ئەم نزیکییە مێژووییە لەسەر بنەمای بەرژەوەندیی ستراتیژی بونیاد نراوە. هەرچەندە ئیسرائیل وەک پاڵپشتێکی مێژوویی دەردەکەوێت، بەڵام ئەم پەیوەندییە هاوکات بووەتە پاساوێک بۆ تورکیا و هێزە ناوچەییەکان تاوەکو زیاتر گوشار بخەنە سەر کورد. لە سایەی ئەم گوشارە هەمەلایەنانەدا، کورد لەبەردەم تاقیکردنەوەیەکی سەختدایە بۆ پاراستنی مافەکانی لە نێوان بەرژەوەندیی زلهێزەکان و هەڕەشە بەردەوامەکانی تورکیادا.
