حکومەتی بەریتانیا ئەمڕۆ دووشەممە بەفەرمی رایگەیاند سوپای پاسدارانی کۆماری ئیسلامیی ئێران دەخاتە لیستی تیرۆرەوە؛ ئەم هەنگاوەش گرژییە دیپلۆماسییەکانی نێوان لەندەن و تاران توندتر دەکاتەوە.
وەزارەتی ناوخۆی بەریتانیا رایگەیاند، "هەر جۆرە پاڵپشتییەک بۆ سوپای پاسداران، قەدەخە دەکرێت."
ئەم بڕیارە دوای چەندین ساڵ لە ململانێ و دووبەرەکیی سیاسی لە ناوخۆی بەریتانیا لەسەر ئەم پرسە هات. بڕیارەکە بە واتای قەدەخەکردنی فەرمیی سوپای پاسداران دێت و لەمەودوا هەر جۆرە هاوکارییەک بۆی، بە تاوان هەژمار دەکرێت.
جگە لە سوپای پاسداران، بەریتانیا بڕیاری دا "بزووتنەوەی ئیسلامیی هاوەڵانی راست" (ئای ئێم سی ئار)ـیش قەدەخە بکەن، کە سەر بە سوپای قودسە. رێکخراوەکە تۆمەتبارە بە ئەنجامدانی زنجیرەیەک هێرش بۆ سەر جووەکان لەناو خاکی بەریتانیا.
هەروەها "فەوجی خۆبەخشانی فیدراسیۆنی رووسیا" (جی ئار یوو) کە لقێکی نێودەوڵەتیی هەواڵگریی سەربازیی رووسیایە، خرایە هەمان لیستەوە.
وەزارەتی ناوخۆی بەریتانیا لە بەیاننامەیەکدا رایگەیاند: "دوای وردبوونەوە لە هەموو بەڵگەکان، وەزیری ناوخۆ گەیشتە ئەو ئەنجامەی کە بنەمای تەواو هەیە بۆ ئەو بڕوایەی کە هەریەک لەم لایەنانە تێوەگلاون لە چالاکیی هەڕەشەئامێزی هێزی دەرەکی؛ بۆیە ئەم ناساندنانە بۆ پاراستنی ئاسایش و بەرژەوەندییەکانی شانشینی یەکگرتوو پێویست بوون."
حکومەتی بەریتانیا ئاشکرای کرد، کە بڕیاری قەدەخەکردنی سوپای پاسداران دوای تێوەگلانیان لە چەندین هەڕەشە لەناو خاکی وڵاتەکەیان هاتووە؛ لەوانەش پیلانێک بۆ تیرۆرکردنی دوو رۆژنامەڤانی کەناڵی ئێران ئینتەرناشناڵ، جگە لە ئەنجامدانی چەندین هێرشی ئەلیکترۆنی (سایبەر) بۆ سەر دامەزراوە بەریتانییەکان.
ئەم هەنگاوە بڕیارەکەی حکومەتی پێشووی پارتی پارێزگارانی هەڵوەشاندەوە کە ئامادە نەبوون سوپای پاسداران قەدەخە بکەن.
