دەسەڵاتی دادوەریی ئێران سزای لەسێدارەدانی بەسەر عیرفان کیانی، یەکێک لە دەستگیرکراوانی خۆپێشاندانەکانی شاری ئەسفەهان جێبەجێ کرد.
ئەمە دووەم سزای لەسێدارەدانە لە ماوەی هەفتەیەکدا کە بەرامبەر بەشداربووانی ناڕەزایەتییەکان جێبەجێ بکرێت.
تاران لەگەڵ زیادبوونی گرژییە ناوچەییەکان و هێرشەکانی ئەمریکا و ئیسرائیل، پرۆسەی لەسێدارەدانی زیندانیانی سیاسی خێرا کردووە. کیانی بە تۆمەتی "تێکدانی موڵکی گشتی و هێرشکردنە سەر هێزە ئەمنییەکان" سزا درابوو.
هاوکات لەگەڵ جەختکردنەوەی سەرۆکی دەسەڵاتی دادوەری لەسەر سزادانی توندی دەستگیرکراوان، ڕێکخراوەکانی مافی مرۆڤ نیگەرانیی قووڵیان دەربڕیوە و پێیان وایە ئەم سزایانە وەک ئامرازێک بۆ سەرکوتکردنی نەیاران لە کاتی جەنگدا بەکاردەهێنرێن.
