بۆ دووەم رۆژی لەسەر یەک، خوێندکارانی چەندین زانکۆی سەرەکی لە تاران و مەشهەد دژی حکوومەت خۆپێشاندانیان کرد و لە زانکۆی "زانست و پیشەسازی" لە تاران گرژی و پێکدادان لەنێوان خوێندکارانی ناڕازی و ئەندامانی بەسیج ڕوویدا.
بەپێی گرتە ڤیدیۆییەکان، سەدان خوێندکار لە دەستپێکی وەرزی نوێی خوێندندا بۆ یادکردنەوەی قوربانیانی خۆپێشاندانەکانی مانگی رابردوو کۆبوونەوە. خوێندکاران دروشمی توندیان وەک "بمرێت دیکتاتۆر" بەرز کردەوە. لە زانکۆی زانست و پیشەسازی، دیمەنەکان نیشانی دەدەن کە بەرپرسانی زانکۆ هەوڵ دەدەن بە دروستکردنی بەربەست، رێگری لە پێکدادانی فیزیکی لەنێوان خوێندکاران و هێزەکانی بەسیج بکەن.
هاوکات، زانکۆکانی تاران، ئەمیرکەبیر، شەهید بەهەشتی و شەریف لە پایتەخت، لەگەڵ زانکۆی فیردەوسی و زانکۆی پزیشکیی مەشهەد، بوونە مەیدانی ناڕەزایەتی. تەنانەت میدیا فەرمییەکانی ئێرانیش دانیان بە بەڕێوەچوونی ئەو کۆبوونەوە فراوانانەدا ناوە کە تێیدا خوێندکاران پاڵپشتیی خۆیان بۆ ناڕەزایەتییە جەماوەرییەکان دووپات کردەوە. ئەم جووڵانەوانە نیشانەی بەردەوامیی بزووتنەوەی خوێندکارییە لەکاتێکدا دەسەڵاتداران هەوڵ دەدەن رێگری لە هەر جۆرە گردبوونەوەیەک بگرن.
