AvaToday caption
ئیتالیا یەکەمین وڵاتی ئەندامی حەوت دەسەڵاتی بەهێزی ئابووری دونیایە کە لە پڕۆژەی ڕێگەی ئاوریشمی چین کە بە "یەک کەمەربەند و یەک ڕێگە" ناسراوە، بەشداری دەکات. ڕێوڕەسمی واژووکردنی ڕێککەوتنەکانی پێوەندیدار بەو پڕۆژەیە لە کاتی سەفەری سێ ڕۆژەی شی جین پینگ سەرکۆماری چین بۆ ئیتالیا و لە ڕۆژی شەممە بەڕێوە چوو.
چین هەوڵ دەدات هاوکات لەگەڵ شەڕی بازرگانی لەگەڵ ئەمریکا پەیوەندی خۆی لەگەڵ وڵاتانی دیکەی ڕۆژاوا بپارێزێت. سەرەڕای ئەو ڕێککەوتنە کۆمپانیا چینی و ئیتالییەکان ١٠ ڕێککەوتنی دیکەیان لە بەشەکانی وزە، پۆڵا و هەناردەی گاز واژوو کرد.
مەزەندە دەکرێ بەهای ئەو ڕێککەوتنانە ٢٠ ملیار یۆرۆ بێت.
