ڕۆژی شەممە ٢٠ی بەفرانبار، ٧ خوێندکاری کورد بە ناوەکانی "فەرزاد سامانی، دەریا تاڵبانی، سالار ڕەهەوی، شەپۆل خزری، ئەفشین مام ئەحمەدی و سیروان نووری"، خەڵکی شاری مەهاباد و سوهەیب بادرووج خەڵکی شاری مەریوان، لە خەوتنگەی زانکۆی خاڕەزمی دەسبەسەر کران و هەتا ئێستا شوێنی گواستنەوەیان نادیارە.
بە وتەی سەرچاوەیەکی ئاگادار کە بۆ تۆڕی میدیایی ئاڤاتودەی قسەى کردووە "شەوانە کۆمەڵێک لە هێزە ئەمنییەتییەکان هەڵدەکوتنە نێو خەوتنگە و دەست دەکەن بە توندوتیژی و پشکنینی ژوورەکان و چاودێری فایلی کۆمپیوتەر و کتێب و موبایل و دەستنووسەکانى خوێندکاران دەکەن و هەموو شتێکیان لێ تێک دەدەن و دەیانگرن و دەیانگوازنەوە بۆ شوێنێکی نادیار.
سەرچاوەی ئاگادارەکە هۆکاری دەستگیرکردنی، فەرزاد سامانی و هاوڕێکانى دەگەڕێنێتەوە بۆ بیر و هزری بەتوانا و دڵسوزییان بۆ ژینگە و نیشتمانەکەیان و ڕێکخستنی گرووپگەلى تایبەت و دانیشتن و خوێندنەوە و گفتوگۆکردن.
سەرچاوەی ئاگادار لە درێژەی زانیارییەکانى بۆ تۆڕی میدیایی ئاڤاتودەی وتی: ساڵی ١٣٩١ى هەتاوى لە شاڕی مەهاباد شەپۆلێکی سەیری سەرکوتکردن و دەستبەسەرکردنی گەنج و لاوانی کورد دەستی پێ کرد، زۆریان گرت و زۆریشیان ناچار کرد ڕابکەن بۆ دەرەوەی وڵات. یەکێک لەوانە فاروق سامانی برای فەرزاد سامانی بوو، کە کەسێکی نەتەوەخواز، نیشتمانپەروەر و شێوەکار و هونەرمەند بوو، تۆمەتی ئەندامبوونی پژاکى دەخەنە پاڵ و بە پێنج ساڵ زیندانى سزاى دەدەن.
فەرزاد سامانى
ئەودەم فەرزاد کە منداڵتر بووە و نیگەرانی چارەنووسی براکەی دەبێ لەبەر هاتۆچوی بۆ دادگا و پێداگری بۆ ئازادی براکەی، دەستگیر دەکرێت و چەند مانگ زیندان بەسەری دەسەپێت و پاش ئازادبوونی لە زیندان بە هۆی گوشاری هێزە ئەمنییەکان تەنانەت بۆ ماوەیەک دەست لە چالاکی مەدەنی دەکێشێت و خەریکى خوێندن لە زانکۆ و خوێندنەوە دەبێت.
فەرزاد دەتوانێت وەک خوێندکاری پسپۆڕى باڵای کۆمەڵناسی، درێژە بە خوێندنی بدات، بەڵام ئەمجارەشیان سەر لە زیندان دەردێنێت و هۆکارەکەی بۆکەس ڕوون نییە.
شایەنى باسە، پیلانی کۆماری ئیسلامی لە ڕۆژهەڵاتی کوردستان، بۆ قەتیسکردنی بچووکترین جموجوڵی فکری، فەلسەفی، ئابووری و پەروەردەیی، ژینگەپارێزی، مەدەنی و سیاسی و ئەدەبی و زانستى... تۆمەتی ئەندامبوون لە حیزبە کوردییەکانە دەخەنە پاڵ لاوان و چالاکانەوە و بەرەو سێدارە و زیندانى و سەرکوتکردنیان دەبەن و بەمەش هەوڵ دەدەن گەلى کورد لە خواستەکانى خۆی کپ و بێدەنگ بکەن.
