ماڵپەڕی ئەکسیۆس بڵاوی کردەوە، سوپای پاسدارانی ئێران لە ماوەی 24 کاتژمێری ڕابردوودا هێرشی مووشەکی کردووەتە سەر سێ کەشتیی بازرگانی و بەهۆیەوە دوو کەشتی زیانیان بەرکەوتووە.
بەپێی زانیارییەکانی ماڵپەڕی ئەکسیۆس کە لە دوو سەرچاوەوە پشتڕاست کراوەتەوە، ئێران هێرشی کردووەتە سەر سێ کەشتیی بازرگانی؛ ڕۆژی دووشەممە دوو مووشەک و ڕۆژی سێشەممە مووشەکێکی دیکە لەلایەن سوپای پاسدارانەوە ئاراستەی ئەو کەشتییانە کراون. لەم چوارچێوەیەدا، ئاژانسی دەریاوانیی بەریتانیش ڕایگەیاند کە ڕۆژی دووشەممە لە نزیک کەناراوەکانی عومان مووشەکێک ئاراستەی یەکێک لە کەشتییەکانیان کراوە.
سەرچاوە ئەمریکییەکان ئاماژەیان بەوە کردووە کە لە ئەنجامی ئەم هێرشە مووشەکییانەدا، دوو کەشتیی بازرگانی زیانیان پێگەیشتووە، بەڵام هیچ زیانێکی گیانی لەنێو سەرنشین و تیمی کەشتییەکاندا نەبووە و ڕانەگەیەنراوە.
ئەم هێرشانەی ئێران لە کاتێکدان کە وڵاتەکە سەرقاڵی بەڕێوەبردنی پرسە و ڕێوڕەسمی ماتەمینییە بۆ عەلی خامنەیی، ڕێبەری باڵای پێشووی ئەو وڵاتە. هەروەها ئەم پێشهاتە دوای ئەوە دێت کە لە دوو هەفتەی ڕابردوودا، بە نێوەندگیریی قەتەر و پاکستان، ئەمریکا و ئێران ڕێککەوتنی ئاگربەستیان واژۆ کردبوو.
