لە درێژەی شەپۆلی دەستگیرکردنی هاووڵاتییانی کورد لە شارە جیاوازەکانی ئێران و رۆژهەڵاتی کوردستان، هێزە ئەمنییەکان چەند کەسێکی دیکەیان دەستبەسەر کردووە، کە لەنێویاندا مێرمنداڵێکی تەمەن ١٥ ساڵ و ئەندامێکی هەڵبژاردەی نیشتمانیی جۆدۆ هەن.
بەپێی زانیارییەکان، زانیار کەنعانی، تەمەن ١٥ ساڵ و خەڵکی شاری سنە، لەلایەن هێزە ئەمنییەکانەوە دەستگیر کراوە و بۆ شوێنێکی نادیار گواستراوەتەوە. هاوکات، ئەمیر محەممەد پیروزی، یاریزانی جۆدۆ و ئەندامی هەڵبژاردەی نیشتمانیی ئێران، لە شاری بۆجنورد دەستبەسەر کراوە.
لەلایەکی دیکەوە، چارەنووسی محەممەد ئازەری، گەنجێکی کوردی خەڵکی ئەسفەرایەن، دوای ٣٧ رۆژ لە دەستبەسەرکردنی بە نادیاری لە زیندانی ئەو شارەدا ماوەتەوە. هەروەها ڕەزا فێردۆس، تەمەن 35 ساڵ و خەڵکی دەڕەشار لە پارێزگای ئیلام، پێنج رۆژە دەستگیر کراوە و تاوەکو ئێستا هیچ زانیارییەک لەبارەی چارەنووسی لەبەردەستدا نییە.
ئەم دەستگیرکردنانە لە کاتێکدایە کە ڕێکخراوەکانی مافی مرۆڤ نیگەرانیی خۆیان لە زیادبوونی گوشار و دەستبەسەرکردنە بێسەروبەرەکان لە رۆژهەڵاتی کوردستان دەردەبڕن، لە کاتێکدا زۆربەی دەستگیرکراوەکان بێبەشن لە مافی بینینی پارێزەر.
